Begibistan laburmetraien lehiaketak baditu irabazleak. Bosgarren urtez, aste osoan zehar laburmetrai desberdinak proiektatu dira Amurrioko Antzokian. Euskal Herriko laburmetraien jaialdirik esanguratsuenetakoa da Begibistan. Hala, euskal film laburrik onena Kote Camachoren "La gran carrera" izatea erabaki du epaimahaiak. Euskarazko film laburrik onena, ordea, Angel Aldarondoren "Ondar Ahoak" izendatu dute.
Saritutako laburmetraiak
Zuzendari onenaren saria, aldiz, Jon Garañok eskuratu du, "El metodo julio" lanagatik. Gizonezko aktorerik onena, Txema Blasco izendatu dute, Paul Urkijok zuzendutako "Jugando con la muerte" ikus-entzunezkoagatik. Emakumeen sailan, Iñake Irastorza saritu dute, Iban Lizarralde zuzendariaren "Gartzela" filmean azaleratutako protagonistarengatik. Gidoi-egile onenaren saria, ordea, Tucker Davilak eraman du, "Los 4 Mcnifikos" lanagatik. Euskal argazki zuzendaririk onena, Garikoitz Diaz da epaileen iritziz. Gaztea saria Paul Urkijoren "Jugando con la muerte" pelikulak eraman du. Infobistan sariaren jabeak Itziar Irizar eta Ivan Cortazar dira; "Eta amama" eta "Desastres" lanengatik, hurrenez hurren. Ohorezko txapela Itziar Lazkanori eman diote.