Orozkoko ADIE talde independienteak festa giroan amaituko du hauteskunde kanpaina. Duela hilabeteak ekin zioten auzoz auzo herritarren arazoak zerrendatzeari. Jasotako ekarpenekin hauteskunde programa egin eta aurkeztu dute. Hala, 19:00etatik aurrera umeen txokoa prestatu dute. 20:15ean, aldiz, Josu San Pedro Orozkoko ADIEren alkategaia herritarrei zuzenduko zaie. 20:30ean, aldiz, pintxo dastaketa egingo dute, eta bederatzietatik aurrera musika emanaldia zein dantzaldia izango da Katü Burü taldearekin.
Hauteskunde amaieraren festak, nonahi
Bihar emango diote amaiera hauteskunde kanpainari eskualdeko hautagai guztiek. Gehienek, festa giroan ospatuko dute. Hausnarketa egunaren ondotik, igandean hurbilduko dira hautesontzietara aiaraldearrak udal eta foru hauteskundeetan parte hartzeko bozka ematera,
Zuzeneko jarraipena
Aiaraldea.com-en zuzeneko jarraipen eta emisioa egingo da. Egunean zehar ateratako argazkiez gain, eskualdeko bederatzi herrietako alkategaien mezua izango duzue ikusgai. Eta, gauean, zuzeneko programa egingo dugu herriz herri jasotako emaitzak hedatuz.