Amurrio Bidean-ek egin duen ikerketaren arabera Gasteizera joateko autobús-zerbitzuak hobetzea da herritarren artean nabarmendu den kezka. Azaldu dutenez, 221 pertsonari galdetu diote herrian faltan zer botatzen duten. 880 ekarpen jaso dituzte. Hurrenez hurren, garraioa, merakataritza, kutlura, kirola, gazteria, osasun-zerbitzuak eta ostalaritza dira eskakizun gehien bildu dituen eremuak. Amurrio Bidean-en arabera, herriko emakumeen gehiengoak estetika eta osasun zerbitzuak ikusi ditu eskas. Gizonezkoek, aldiz, ingurumenaren, turismoaren eta lan munduaren inguruko arazoak bistaratu dituzte.
Garraioa hobetzeko egin dituzten proposamenen artean, Gasteizerako autobús-zerbitzua areagotzea eta eskualdeko autobus linea sortzea daude. Merkataritzaren alorrean, arropa modernoa salduko dituzten dendak, produktu ekologikoen salmenta eta garbiketa-zerbitzuak eskatu dituzte. Kirolari dagokionez, estalpedun gune bat egitea proposatu dute, gimnasia "aire librean" egiteko. Gazteen aisialdirako lokalen beharra ere plazaratu du ikerketak, edota osasun-zerbitzuak hobetzeko exijentzia: ginekologo eta pediatra gehiago jartzea eta eskualdeko erietxea eraikitzea. Ostalaritzari buruz galdetuta, aldiz, espezialitatedun jatetxe eta "janari azkarra" eskainiko luketen txokoak bota dituzte faltan. Baita prestakuntza-eskaintza ere, besteak beste, hizkuntzak ikasteko eskola.