Pasaden astean aurkeztu zuten Amurrion Euskararen Gizarte Erakundeko Kontseiluak egindako udalen hizkuntza azterketa. 66 udaletako euskararen egoera ikertu dute. Besteak beste, udalak euskara ordenantzarik duen, euskara plan orokorrik duen eta azken urtealdian euskarari zenbateko aurrekontu orokorra eman dioten konprobatu dute. Baita udalak diruz lagundutako talde eta entitateek errotulazioa euskaraz izan dezaten erabakirik hartu duten, kaleetako kartelen hizkuntza zein den, edo udaletxeetako errotulu formaletan zein hizkuntza nabarmentzen den.
Txostenak dioenez, Laudioko udaleko nota 4.35ekoa izan da, "eskasa". Euskara hizkuntza ofiziala izan arren ezagutza tasa %49.1 dela azaldu dute. Hala, 66 herritatik 39. postua eman diote Laudiori. Dena dela, nabarmendu dute, 2010ean aurrerapausoa eman duten 10 herrien artean dagoela, Baiona, Baztan, Berriozar, Biarritz, Donibane-Lohitzune, Errenteria, Gares, Lesaka, Oion eta Santurtzirekin batera. Amurriori, aldiz, 6.1 nota eman dio ikerketak. Ezagutza tasa 46.1ekoa dela eta, ordea, "ez nahiko" jarri diote. Alabaina, rankingean 22.herri gisa azaldu dute.
Datuen arabera, 66tik 16k baino ez du gainditzen. Alegia, 50 udalek suspenditzen dute. “Oso ongi” atera dutenak 10 dira: 3 Bizkaian eta 6 gipuzkoan, guztiak ere eremu ofizialean. Alderdiei dagokienez, 7 EAJren udalak dira, 1 ANVrena eta 1 Hamaikabatena. “Ongi” atera dutenak 7 udal dira. 6 gipuzkoarrak, bat bizkaitarra. Guztiak ere eremu ofizialekoak eta guztiek %70eko ezagutza tasa gainditzen dute. Hiru udal ANV-k kudeatzen ditu, bi EAJk eta bat Eak. Hala ere, kezkatuta agertu dira ikerketaren egileak: "218.088 biztanlerengan baino ez dute eraginik politik egoki hauek. Honek esan nahi du aztertutako herrietan 1.893.826 herritar hizkuntza-politika desegokien ondorioak pairatzen dituztela".