Berbaldia lau zatitan banatu zen. Lehenengoan Josu San Pedrok, ADIE taldeko zerrenda burua, hartu zuen berba aurkezpena egiteko. Bertan, herritarrak zelan jakin zuen parke eolikoaren gaineko informazioa azaldu zuen, besteak beste: “orain hilabete (martxoaren 1ean) Euskal Herriko Aldizakri Ofizialean publikatu zen Jesurin parke eolikoa egitearen aldeko erabakia. ADIEko kideok berri hori egunkarietan irakurri genuen, bertan enteratu ginen erabaki horren ondorioz, enpresa batek edozein momentutan Jesurin parke eolikoa ezarriko duela” argitu zuen San Pedrok.
Herritarren informazio eza ikusita eta parke eolikoen onurak eta kalteak ezagutu guran erabaki zuten antolatzea berbaldia: “Uste dugu Orozkoko jendeak energia alternatiboei buruzko informazioa eduki behar duela. Jakin behar dugu zer egin nahi duten gure mendietan, gero bakoitzak bere iritzia edukitzeko“. Izate taldeko sekretario eta bozeramaile den Sergio De Juanek energia eolikoaren alde onak eta txarrak azaldu zituen. Horretarako, besteak beste, Arkamoko irudiak eta datuak baliatu zituen.
Juan Abadek, Arabako Diputazioko ingurumen-inpaktuen zuzenketa eta balorazio saileko nagusiak ere hartu zuen parte hitzaldian. Alde batetik, azken urteotan Araban energia eolikoaren inguruan egindakoak azaldu zituen; hala nola, Badaia, Arkamo… eta beste alde batetik, Mugarri planaren laburpena egin zuen. Nerea Azkoaga ADIEko kidea ere mintzatu zen. Hasteko, Jesuriko parke eolikoaren proiektuaren berri eman zuen eta, ondoren, Orozkorako eta orozkoarrentzako izan ditzakeen onurak eta kalteak esan zituen, proiektuan ageri diren datuak oinarri hartuta.
60 lagun inguru batu zen Donibane Aretoan. “Sano gustura egoteko moduan gagoz, aste barruan izanda, jente askok erakutsi dau Jesuriko parkearen gaineko interesa-eta” adierazi du Josu San Pedrok.