Manex Agirrek irabazi du Arabako bertsolari txapelketako lehen finalerdia. Atzo eman zitzaion hasiera apirilaren 2an jokatuko den finaleko aulkiak betetzeko lehiari. Ehun bat bertsozalek animo eta txaloz bete zuten Zigoitiako kultur etxea. Ainhoa Comas amurrioarrak Andere Arriolabengoa aramaioarraren ordez kantatu zuen, azken momentuko arazo bat medio ezin izan baitzen bertaratu.
Hala, arratsaldeko 17:30ean eman zitzaion hasiera bertso saioari. Oholtzan, Serapio Lopez, Irati Anda, Oihane Perea, Manex Agirre, Ainhoa Comas eta Felipe Zelaieta izan ziren. Bertso saioa gora beheratsua izan zen, urduritasunak ez zien bertsolari batzuei zorterik ekarri. Nabarmentzekoa da, Ainhoa Comas eta Manex Agirrek zortziko txikian egindako lana, bizia eta umoretsua izan baitzen.
Epaimahaiak honako sailkapena ebatzi zuen: Manex Agirre (354,5p.), Oihane Perea(348,5p.), Felipe Zelaieta (294,5p.), Serapio Lopez (291p.), Ainhoa Comas (283p.) eta Irati Anda (278p.). Manex Agirrek eskuratu du, hortaz, Arabako bertsolari txapelketako finaleko aurreneko txartela. Gainontzekoek asteburu honetan Aramaio eta Aguraineko finalerdien puntuazioen zain egon beharko dute.