Larunbatean jokatu zen Arabako Bertsolari Txapelketako lehenengo kanporaketa Basalarrina elkartean. 19:30ean eman zioten hasiera trikipoteoarekin bertsoaren festari. Ondoren, 54 lagunek afaldu zuten abasto plazan kokatuta dagoen txokoan. 23:00etan eman zitzaion hasiera bertso saioari, eta Oihane Perea, Bingen Sainz, Alberto Martinez "Beitto", Ainhoa Comas, Xabi Igoa eta Rikardo Gonzalez de Durana bertsolariak bertsoz hustu eta zaleak betetzen saiatu ziren.
Lierni Altuna gai-jartzaileak jarritako gaiei zortziko handian zein txikian hiruna bertsorekin erantzun zieten. Gero, bakarkako lana iritsi zen: puntuari erantzutea, eta hitzari bertso bat botatzea.
Saioa bizia izan zen. Oihane Pereak ez zuen hutsik egin eta dotore jardun zen. Ainhoa Comas amurrioarrak, bosgarren gelditu arren, ateraldi politak izan zituen, zortziko handian batez ere. Alberto Martinez Beittorekin bikote baten egoera egokitu zitzaien. Beitto, Ainhoaz lotsatzen zen. Kulero gabe parrandan atera zela argudiatuta, Ainhoaren lagunekin geratuko zela kantatu zion Beittok. Ainhoak, maniki bat nahi bazuen dendan soberan dituztela abestuz amaitu zuen bertsoaldia.
Epaimahaiak ondoen aritutako bertsolaria Oihane Perea izan zela ebatzi zuen, eta hortaz, finalerdietara zuzenean sailkatutako lehen bertsolaria izango da. Xabi Igoa, Rikardo Gonzalez de Durana, Alberto Martinez Beitto, Ainhoa Comas eta Bingen Sainz geratu ziren hurrenez hurren, haren atzetik.
Aiaraldeko gainerako bertsolariek datozen asteburuetan jokatuko diren kanporaketetan duten onena eman beharko dute, finalerdietara pasatu nahi badute behintzat.