Aiaraldea Komunikazio Lehioak antolatutako Udazkeneko Multimedia Eskolen barnean, telefono mugikorretik interneten zuzenean nola emititu azaldu zuten Patxi Gaztelumendi eta Gorka Julio teknologia adituek, atzo. Hitzaldia Udal Lanbide Heziketa Eskolan izan zen, eta 10-15 lagun bertaratu ziren. Gaztelumendik orain arte egindako esperimentuen esperientziak izan zituen hizpide. Hala iragan ekainak 29ko greba orokorraren telebista, nola larunbatean Larrabetzuko gaztetxean ospatutako bertso saioaren zuzeneko emisioaren esperientzia konpartitu zuen. "Adierazi EH-ren prentsaurrekoa telefono mugikor baten bidez sareratu genuen. Garak lotura baten bidez webgunean zuzenean bota zuen, eta Hala Bedi irrati libreak soinua baliatuta uhinetan gertatzen ari zenaren berri eman".
Gaztelumendiren arabera, internetetik zuzenean emititzeak onura asko dakartza. Larrabetzuko bertso saioan, esaterako, gaztetxea jendez lepo zegoela-eta herriko tabernaren batetik zuzenean ikusi zuen bertsozale batek. "Interneteko irudia telebistaratuz eta tabernako altabozetatik soinua hedatuz", azaldu du. Ekainaren 29ko greba orokorraren pikete grabazio bati "Argia Saria" eman zioten.
Gorka Julio, aldiz, streamming, livestream, eta qik tekniken erabileraz mintzatu zen. Hau da, bideo kamera edo mugikor bidez zuzeneko internet emisioak egiteaz. Jarduera bakoitzak dituen abantaila eta desabantailak argitu zituen. Qik programarekin, adibidez, portatila mobilera konektatu eta grabatzen ari zaren irudiari twitter bidezko mezuak gehi dakizkioke. Era honetan, emaitza, telebista programa baten antzekoa litzateke.
Livestreama; webcam, mugikor edo kamera bidez zuzenean emititzea da. Julioren ustez, teknika baliagarria da: "jendeak txat bidez parte har dezake eta grabazioaren linka lapurtuz edozein webgunetan emiti daiteke grabatutakoa".
Qik-en erabileraz, dio, telefono mugikorretik grabazioak sareratzea ekarri duela. Horretarako SMS, internet edo mugikorretik aplikazio bat jaitsi beharra dago. "Mobiletik emititzeko qik.com/phones helbidean balio duten sakelekoen zerrenda dago". Qik sistemaren onuretako bat, zuzenean emititu eta linka hedatzeko aukera da. Juliok gaineratu du qiken zuzenean emititutako dena irekitako kontuan artxibatu egiten dela. Gainera, facebook, twitter, youtube, blogger... konfiguratuta dutenek Mynetworks ataletik aukeratutako sare sozialean publikatu dezakete edukia. "Baita youtuben ere. Honek, denbora aurreztea dakar". Horregatik, Gorka Juliok horrelako bideak lantzen hastearen garrantzia nabarmendu du.