Laudioko Udalean astelehenean egindako Udalbatzan, euskararen erabilerako ordenantzaren moldaketak behin behineko izaeraz onartu dituzte. 30 eguneko epean behin betiko bilakatuko da erabakia. Besteak beste, aldaketen ondorioz euskara eta gaztelania maila berean egonagatik bi hizkuntzetan ahoz zein idatziz komunikatzeko eskubidea aldarrikatu dute. Ondorioz, Udalak euskara hutsean komunikatuz bizi nahi duten herritarrek horretarako aukera izan dezaten beharrezko neurriak hartuko dituela iragarri ditu.
Esate baterako, Udaleko zerbitzuak euskaraz eta erdaraz eskainiko dituzte, eta Udaleko langileei zein herritarrei bidalitako edozein jakinarazpen euskaraz ere egiten dela konprobatuko da. Hartutako erabakiak Udaleko zigiluei ere eragingo die, ezen eta bi hizkuntzetan argitaratuko baita. Horretaz gain, lan munduan euskaraz jarduteko eskubidea errespetatu eta bultzatuko dutela jakinarazi dute, eta Udaleko ekimenetan noiz zein hizkuntza erabiltzeko baldintzak zehaztu.
Moldaketen proposamenei EAJk eta Ezker Abertzaleak babesa eman zieten, PPk abstentzioaren alde egin zuen eta PSEk kontra. Alderdi Sozialistak gaineratu du alegazioak aurkeztuko dituela. Txaro Sarasuaren arabera, talde politikoei bidalitako oharren hizkuntzen erabileran euskarak gutxienez egon behar duela esaten da. "Legearen arabera Hizkuntza bietan agertu beharko luke". PPkoek ordenantzaren behin betiko onarpenaren alde egingo dutela adierazi dute, baldin eta testu guztiei euskaraz zein gazteleraz hierarkia eta tipografia berdina ematen baldin bazaie.
Ezker Abertzaleak, aldiz, kezka agertu du moldaketak beharrezkotzat jo arren: "Udaletxean asko dira PNVren aldeko bozkekin onartutako euskararen aldeko neurriak, baina gero ez dituzte betetzen eta ez dute bitartekorik jartzen bete daitezen", azaldu du Gaizka Amorrortuk komunikabide batean.