Ikasle Abertzaleek antolatutako Ikasle Egunaren baitan, 1500 lagun bildu ziren atzo Amurrioko kaleetan euskal eskola bat aldarrikatzen. Besteak beste, "Euskaraz ikasi, euskal herria ikasi", "hezkuntz sistema nazionala" oihuak nonahi entzun ziren, baina gazteen aurkako azken sarekadan atxilotu zuten Ikoitz Arrese IAko bozeramailea eta atxilotuak ere izan zituzten gogoan.
Guardia Zibilak herriko sarrera guztietan ezarritako kontrolengatik ordu erdi atzeratu zuten manifestazioaren hasiera. 18:30en bueltan iritsi ziren lehen manifestariak Ikasle Egunerako jarritako karpan prest zegoen ekitaldi politikorako. Gazte batek eginiko performance batek ireki zuen ekitaldia. Ondoren, bideo baten bitartez ikasleek igaro duten urteari errepasoa eman zioten. Ikasle presoak ere oroitu zituzten, poesiaren eta gitarraren laguntzaz. Ikasle mugimenduak ikastetxe zein unibertsitatean jasaten duten errepresioa salatzearekin batera irailean Palestinara joandako ikasle brigada kulturaletik Palestinako ikasle baten hitzak pantailaratu zituzten. IAk eginiko interbentzioan, ordea, ikasle mugimenduaren lana eta beharra gogoratu zuten. Bertaratu zirenek, hezkuntza sistema nazionalarekin eta IAk 50tik gora eragilerekin sinatutako manifestua izan zuten aldarri.
"Gora euskal ikasleria! Gora ikasle abertzaleak" oihuarekin karpa hustu eta Gose, Doctor Deseo, Habeas Corpus, La pulqueria eta Ze esatek taldeek berotu zuten kaleko hotza. Gaurtik aurrera, baina, datorren urtera arte itxaron beharko dute ikasle eta abertzaleek Ikasle Egunaz gozatzeko.