Euskal Herritarrak mendizaleak garela gauza jakina da, eta hala agertzen dugu aiaraldearrok. Aurreko asteburuetan Orozkoko XXII. Iraupen Mendi Ibilaldia eta Arrankudiagako Mendi Martxa izan dira, eta hurrengo igande honetan, urriak 10, Urduñari dagokio txanda.
Izan ere, Txarlazo Mendi Taldeak VII. Mendi Martxa antolatu du. Aurtengoan ere 2 ibilaldi egongo dira, mendizale eta ibiltari ezberdinentzat pentsaturikoak: bata 25 kilometrokoa eta bestea 14 kilometrokoa. Luzeena goizeko 8etan irtengo da hiriko Foru Plazatik, eta laburrena, apur bat beranduago, goizeko 10etan. Bietan parte hartzeko, egunean bertan izena eman beharko dute mendizaleek plazan egokituko diren mahaietan.
Urduñako eta Gorobel Mendilerroko bazterrak ezagutzeko aukera paregabea, izan ere, Txarlazo Mendi Taldearen helburuen artean, mendizaletasuna sustatzeaz gain, gure mendietako bidexkak eta txokoak ezagutaraztea dago. Urduñako Mendi Martxaz gain, datorren hilaren 7an, Amurrioko Mendiko Lagunak Taldeak XXIV. Mendi Ibilaldia egingo du. Nagitasunari eta oheko epeltasun goxoari aurre egin eta udazken hontan denok mendira!