"Ea, ea, ea, gaztetxea!" oihuen artean Amurriora bidean Gaztetxeen aldeko Aiarako I. Martxa. Harrera ekitaldiarekin eman zaio hasiera eta Laudio, Amurrio eta Urduñako Gazte Asanbladen ordezkariek adierazi dute "Herrian eta mendian gazteok ekinean" lemapean martxaren bitartez gaztetxeen aldeko indarrak bildu, antolatu eta gazteen eskubideak eskualde osoan aldarrikatu nahi dituztela. Zumalakarregi zeharkatu eta Luiaondorako bidea egiten ari dira uneotan gazteak. Elorritxugane mendia igo eta Amurrio izango dute gaurko helmuga. Bertan, arratsaldean zehar Herri Kirolak izango dituzte, 19:30tan bertsopoteoa eta 21:30tan akanpalekuan AHTren inguruko hitzaldia.
Hiru herri, aldarrikapen bat
Aiarako Gazte Asanbladek hasiera ekitaldian gogorarazi dute Amurrio, Urduña eta Laudioko herriek oztopo ezberdinak izan arren, helburu berdina dutela, "asanblerismoan oinarrituta autogestioa motor gisa baliatuz Euskal Herriko gazteria kapitalismoaren atzaparretatik atera eta aldaketarako alternatibak sortzea". Aipatu dutenez, "Laudion nahiz eta gaztetxea eduki gazteriaren pasibitatea nabaria da lokalen ondorioz, herria pizteko zailtasun ugari ditugu. Amurrion, herri mugimendua handiagoa izan arren ez dugu gaztetxerik, eta udalak oztopo ugari jartzen dizkigu ekintzak burutu ahal izateko. Urduñan berriz, hiru urte pasa dira gaztetxea bota eta kanporatu zutenetik, epaiketa bidez gazteria kriminalizatuz".
Era berean, Aiarako Martxaren bidez ongietorria eman diote bertaratu diren 50 lagunek Orozkon sortu berri den Gazte Asanbladari. "Sorrera zaila izan den arren gure ongietorririk beroena ematearekin batera Aiarako asanbladekin batera lan egitera gonbidatzen ditugu".
Haatik, nabarmendu dute, gazte asanbladek bizirik dirautela, eta gaztetxea lortzeko borrokan eta gaztetxeen borrokatik kanpo gazteria mugitu eta bultzatzeko herrian zein mendian ekinean jarraituko dutela. "Etxebizitza eskubidea borrokatuz, prekarietatea salatuz, euskara bultzatuz, kapitalaren sistema apurtuz, emakume zein gizonen arteko parekidetasuna eta hainbat eta hainbat borroka aurrera eramanez gazteoi dagozkigun eskubideak lortu arte lanean segitzeko konpromisoa berresten dugu".