Aurtengo San Roke jaiak iragartzeko kartela zein izango den erabakitzeko azken fasea gaur hasi da. Laudioko Udalak antolatutako lehiaketan aurten ere ugari izan dira hautagai izateko Kultura eta Jaien Sailean aurkeztu dituzten lanak. Irudiak, Laudioko Kultur etxean egongo dira ekainaren 5 arte ikusgai. Bertara hurbiltzen diren laudioarrak, bozka bidez gustukoena zein duten aukeratuko dute eta babes gehien jasotzen duena izango da garailea.
50x70 zentimetrotako neurria eta "San Roke 2010 Laudio jaietan/Llodio en Fiestas. Abutuak 15, 16, 17, 25, 26, 27, 28 eta 29 Agosto" leloa eramatea zen baldintza. Hala, astelehen honetan itxi zen lanak aurkezteko epea, eta gaurtik aurrera, artisten inspirazioa herritarren eskutan geratuko da. Irabazlearen izena ekainaren 6an jakingo da eta 700 euroko saria jasoko du kartelaren egileak.
Jaiak Koordinakundeak kartela aukeratzeko bozketan parte hartzeko eskatu du
Prentsa ohar bidez, Jaiak Koordinakundeak gogoratu du, jai herrikoi eta parte-hartzaileen alde lan egitearen emaitza dela kartela bozketa bidez aukeratzea. "Duela hiru urte kartela herritar guztien artean hautatzeko aukerari ateak zabaltzea lortu genuen". Hori dela eta, Kultur Etxera hurbildu eta laudioko jaietako irudi nagusia izango den kartela hautatzera animatu dituzte laudioar guztiak. Era berean, parte-hartzearen bidean lanean jarraitzeko konpromisoa berretsi dute. "Gure jaietako hainbat eta hainbat atek itxita jarraitzen dute -pregoilaria hautatzeko prozesua, jaiak goitik behera zehazteko batzordea...- eta horiek guztiak ireki arte ez dugu etsiko".