IRITZIA

Unai Galdos lagun eta futbol jokalariari omenaldia

Erabiltzailearen aurpegia
Unai Galdosek urte ugari eman ditu CD Laudion. / CD Laudio

Pasa den larunbatean Ellakurira jo genuen Unai Galdosen azken partida zelako CD Laudiorekin. Aukera paregabea zen azken oroitzapen bat izateko eta azken agurra emateko.

Giroari dagokionez, bizitza osoa futbolean jokatzen eman ondoren, haien bizitzetan eragina izango duen erabaki bat hartzear zeudela nabaritzen zen futbol zelaian.

Partida jokatzen zen bitartean, harmailetan bera, Jon Patiño eta Mikel Elejalde agurtzen zituen pankarta jarri zuten. Gainera, partidaren amaieran, taldekideek sinatutako kamiseta eta plaka bana eman zizkieten.

Halaber, taldeko fisioterapeutak aurreskua dantzatu zien hirurei. Horrek argitara atera zuen taldeko kideen eta Andereren (fisioterapeutaren) artean dagoen erlazio bikaina.

Aurretik aipatutakoaz gain, taldekide zein gorputz teknikoko kideok afaria izan genuen azken agurra emateko.

Taldea eta aldagela asko gustatu zaion jokalaria izan da Unai, talde helburuak helburu pertsonalen gainetik jarri dituena. Aldagela barruan broma edo txantxaren bat zegoenean mundu guztiak bazekien bera saltsan zegoela. Horrek taldea asko indartzen du eta hori zelaiaren barruan nabaritzen da. Gaitasun pertsonalei dagokienez, jokalari indartsua eta fisikoa izan da, baloi bat galdutzat ematen ez duen horietakoa.

Entrenatzeko gogo handiak ez zenituen egun horietan, bera gai zen zure gogo-aldartea aldatzeko, eta horrek ekarpen handia egiten du pertsonaz osatutako talde batean.

Hortaz, omenaldia erabat merezi zuen Unaik, gaztea zenean zenbait urtez jokatu zuen CD Laudion eta orain, preferente mailan, azken bi denboraldiak igaro ditu klubean. 

Gainera, ekitaldia are bereziagoa izan da, Jon Patiñok eta Mikel Elejaldek ere utzi dutelako kirola. Azken finean, momentu asko pasa dituzte elkarrekin, bai Laudion azken urte hauetan, zein Amurrion urte batzuk lehenago, futbolaz aparte lagunak ere bilakatuz.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide