Atzo gauean, Galbahe taldeak zuzeneko berezia eskaini zuen Faktorian, Basa zikloaren barruan, Ez gara dena ahazteko adina biziko disko berriaren aurkezpenaren harira. Hasieratik nabari zen ez zela ohiko kontzertu bat izango: kantuek maitasuna, memoria, zauria eta komunitatea izan zituzten ardatz, eta publikoak adi eta gertutik jarraitu zuen emanaldi osoa.
Diskoko piezek indar berezia hartu zuten zuzenean. Taldeak tentsio emozionala eta energia uztartu zituen, une intimistetatik eztanda kolektiboetara igaroz naturaltasun handiz.
Basa zikloak euskara, gorputzak eta naturak bizigarritasunari begira eskaintzen diguten horren bilaketa proposatzen du, eta zikloak sustatzen duen erroetara begiratzeko, hausnarketarako eta kultura bizitzeko modu partekatu horrekin bat egin zuen kontzertuak. Ez zen soilik musika emanaldia izan, baizik eta entzuleekin eraikitako espazio komun bat.
Galbaheren proposamenak belaunaldi baten kezka eta oroitzapenekin konektatzen du. Amaieran txalo luzeek baieztatu zuten disko berriak bide sendoa hasi duela, eta Basa zikloaren barruan bizi izan zen gauak arrasto berezia utzi zuela bertaratuengan.
Gotzon Barandiaranen Galbahea poema liburutik errezitatutako poemek maitasunaren zaurgarritasuna, memoriaren arrastoak eta heriotzaren presentzia ukitu zituzten etengabe, baina tonu ilunetik ihesi, elkarbizitzaren eta komunitatearen beharra azpimarratuz.
Barandiaranekin batera beste bost artistek hartu zuten oholtza: Lander Bilbao ahotsan eta gitarran; Mariana Blanco eta Uxue Garcia biolinean; Rafa Rueda baxuan, gitarran eta teklatuetan; eta Urdin Baraiazarra mandolinan.
Hitzek askotan eguneroko keinu txikietara ekarri zuten hausnarketa: nola gogoratzen dugun, nola zaintzen dugun elkar eta zer geratzen den dena igaro ostean.
Argazkiak: Maider Ramirez Martin