KIMUAK
Laudio Eskubaloi Taldeko txikienek, iragan larunbatean Luis Elejalde taldearen aurka jokatu zuten. Pasa den partiduan baino itxura askoz hobeagoa erakutsi zuten eta pixkanaka- pixkanaka kontzeptuak bereganatzen ari direla esan beharra dago. Partiduak aurrera egin ahala eskubaloi maila altuagoa eskuratuko dutela ziur gaude.
HAURRAK
Corazonistas A taldearen aurkako partiduan, Laudioarrek 32-12 galdu egin zuten. Gasteizko taldea, bigarren urteko jokalariekin erasoan zein defentsan joko bizi eta indartsua erakutsi zuten partidu osoan zehar.
MUTILEN KADETEAK
Zallako polikiroldegian jokatutako partidua bertako taldearen aurka iragan igandean eguerdiko 12etan. Lehenengo zatian Laudioko taldea nagusitu zen erasoko joko oparoa eta defentsa indartsua eginez. Atsedenaldia eta gero etxeko taldea bi puntuak lortu nahian atera zen eta amaierarako lau segundo besterik falta ez zirenean gol bat gainetik zeuden. Falta baten eraginez eginiko jaurtiketa oso on bat eta gero berdinketa lortu egin zuen Laudioko taldeko Anderrek. Bihotzekoa jotzeko moduko berdinketa izan bazen ere, taldea eginiko lanarekin pozik atera zen.
NESKEN KADETEAK
San Adrian C taldearen aurkako partidua jokatu zuten pasa den larunbatean Laudioko Granja Polikiroldegian. Kanpoko taldea nagusi izan bazen ere, markagailuak islatzen duen aldea joko aldetik egon zena baino askoz handiagoa da. Izan ere, arabarrek jaurtiketa ugari zutoin edota langaren kontra jo zuten. Dena dela, sentsazio positiboekin atera ziren, astean zehar entrenatutako gauzak partiduan islatu baitzituzten. Azkenengo emaitza: 12-28.
SENIOR
Iragan larunbatean Escolapios A taldearen aurka jokatu zuten Laudioko Granja Polikiroldegian. Lehenengo zatia oso berdintsua izan zen eta etxeko taldea markagailuan goitik egon zen minutu askotan zehar. Azkenengo minutuetan, alabaina, lehenengo linean izandako jokalarien falta sumatzen hasi ziren eta kanpoko taldea gol bateko errentarekin atsedenaldira joan zen. Bigarren zatia lehenengoaren azkenengo minutuen antzera joan zen eta Bilboko taldeak kontagailuan ihes egitea lortu zuen. Azkenengo emaitza: 18-31