Bizilagunak: gure ondoan bizi direnak.
Axola du gure ondoan bizi denak? Bai, noski! Gure etxe ondoko atean jo beharko dugu uneren batean bizilagunari laguntza eskatzera. Igogailuan batera igoko gara, eta eguraldiaren gaia hizpide hartu. Atariko postontzietan elkarren alboan egongo gara ea banketxearena ez den gutunen bat heldu zaigun begiratzen. Balkoian jartzeko landare baten aldaxka emango diot eta emango dit. Gure umeak eta bizilagunarenak korrika abiatuko dira eskaileretan behera, eskolara. Parkean une beretsuetan egongo gara eguzki epela dagoenean…
Eta axola du gure bizilagunak nongoan diren? Bai noski! Bere janariaren usainak nire jakinmina piztuko du eta errezetak eskatuko dizkiot, nik nire bizkotxo egin berria pasatzen diodan unean. Gu HMren modaz denok antzera jantzita ibiltzen garen bitartean, bere arroparen koloreaz mirestuta nago! Eskatu diet haien hizkuntzan erabiltzen diren hitz errazak guri irakasteko, haiek gurekin komunikatzeko izugarrizko ahalegina egiten ari direla konturatu naiz eta. Zelan ez du izango, bada, garrantzia gure ondoan bizi denak, bere bitartez nire esperientzia-kutxa betetzen baldin badoa!
Baina, batzuetan, batzuek nahita eta gutako gehienok ezjakintasunez, ez dugu modua topatzen bizilagunarengana hurbiltzeko. Hitz erdia baino gehiago gurutzatuko genuke, baina ez gara ausartzen. Lagunduko genieke, baina erreparoa ematen digu. Horretarako sortu zuen CEAR-ek Bizilagunak ekimena: elkarren alboan bizi garenok, baina elkartzeko bidea topatu ezinda gaudenok gune bat izateko. Urte batzuetan zehar, herri askotan, bertoko familiek gure ingurura bizitzera etorri den beste familia edo pertsonak hartu izan ditugu gure etxeetan ekimena gauzatzen den egunean: mahai baten bueltan, bi kultura diferente elkartu, eta jaki desberdinak dastatzen ditugun bitartean, bizitzari beste ikuspuntu batetik begiratzen saiatu, etxeko atea zabalduta. Aurten, aldiz, Amurrioko “Zurrumurruen aurkako taldeak”, CEARrekin batera, gune hori kalera aterako dugu, eta azaroaren 14an, plazan elkartuko gara bazkaltzera euskal herritarrak, marokoarrak, italiarrak, Siriakoak, argeliarrak, sahararrak, kolombiarrak, kataluniarrak, Mexikoko lagunak… Bakoitzak bere janaria eramango du, eta elkarren ondoan, inork inor epaitu gabe, denok gure barrua aberastuko dugu, bizilagunak edonongoak izanda ere, beti garrantzitsuak direlako.