Euskadiko Mugikortasun Jasangarriari buruzko 11/2023 Legearen arabera, EAEk mugikortasun-plana 2025. urtea amaitu baino lehen onetsi behar du. Gainera, 11/2023 Legeak mugikortasun jasangarria zeharkako genero-politiketan eta parte-hartze publikoan oinarritzen du.
4/2019 Legearen eta 11/2023 Legearen arabera, mugikortasun jasangarriaren diagnostikoa egin behar da mugikortasunaren plangintza-tresnak egin ahal izateko, bai EAEn, bai eskualdean.
Horregatik, duela gutxi, Nerbioi-Ibaizabal Mankomunitateak mugikortasun diagnostikoa egiteko kontratua egin du.
Mugikortasun-diagnostikoan egungo garraio-ohiturak aztertuko dira eta hobetzeko aukerak zehaztuko dira, eskualdeko herritarrek erakusten dituzten beharrak kontuan hartuta. Egikaritzea Euskal Autonomia Erkidegoko Jasangarritasun Energetikoari buruzko 4/2019 Legean eta Euskadiko Mugikortasun Jasangarriari buruzko 11/2023 Legean eskatutakora egokituko da.
Azterketa-prozesu osoan zehar eta zeharka, parte-hartze prozesu bat egingo da, eta bertan eskualdeko herritarren ekarpenak jasoko dira. Hori dela eta, herritarrei bideratuta dagoen inkesta bat luzatu da, eskualdeko herritarrek gehien egiten dituzten joan-etorriak identifikatzeko eta garraioarekin lotuta dauden beharrak jasotzeko, hala, hobekien egokitzen diren neurriak proposatzeko. Inkesta martxoaren 31tik maiatzaren 9ra egongo da eskuragarri, eta formatu fisikoan zein formatu digitalean bete ahal izango da, honako esteka honen bidez.
Mankomunitateko udalerriren batean bizi, lan egin edo ikasten duten pertsona guztiei zuzenduta dago inkesta: Arakaldo, Arrankudiaga-Zollo, Arrigorriaga, Etxebarri, Orozko, Ugao-Miraballes, Urduña, Zaratamo eta Zeberio.
Nerbioi-Ibaizabal Mankomunitateak eskualdeko pertsona guztiak animatzen ditu inkestan parte hartzera, garraio-sare jasangarriagoa eta benetako beharretara egokitua lortzeko.
Mugikortasun-diagnostikoa egiteko, Bizkaiko Foru Aldundiko Garraio, Mugikortasun eta Turismo Sailaren finantzaketa jaso da.