Gaurkoan, maiatzaren 27an, Begibistan jaialdian 1. lehiaketa eguna izan dugu. Sail bietan, bai OFIBISTAN, bai INFOBISTAN, Euskal Herrian ekoiztutako hainbat laburmetraia ikusi ahal izan ditugu. Irekiera-ekitaldian ikusi genuen bideoak iradokitzen zuen moduan, atal bietan barietatea izan da nagusi generoei dagokienean.
OFIBISTAN sailari arratsaldeko 20:00etan eman zaio hasiera. Guztira 7 lan ikusi ditugu, euren artean 2 euskaraz. Dokumentalak, dokumental-faltsuak, drama, humorea... denetarik izan dugu gozagarri lehen lehiaketa egun honetan. Lan batzuen orijinaltasuna azpimarratzeko modukoa izan da, hala nola, “Él nunca lo haría” edo “Ahate pasa” bezalako proposamen bitxiak. Bestalde, oro har lanen kalitatea altua izan dela azpimarratu nahi nuke.
INFOBISTAN atalari gaueko 22:00etan ekin aurretik, zenbait filmen zuzedarien adierazpenak entzuteko parada izan dugu. Honela, Luken Hidalgok (“Mi turno”), Juan Bidegainek (“Etxeko bandan”) eta Txemi Llano (“Uno que toque”) amurriarrak euren lanen aurkezpena eta hainbat xehetasun eman ahal izan dituzte. Sail honetan 10 izan dira bistaratu ditugun lanak: 2 euskaraz, ingeleraz 1 eta gainerakoak gaztelaniaz. Lanen kalitatea eta jatortasuna nabarmentzekoak izan dira. Gogoratu beharrekoa da, sail honetako garaipen-zerrenda ikuslegoak ematen dituen botoen arabera osatuko dela. Honetarako, baina, film bakoitzari 1etik 5etarako puntuazioa esleitu behar zaiolarik.
Amurrioko Antzokian gozatzen ari garen IV. Zinema aste honek bide onetik darrai.