Gaur, maiatzaren 26an, arratsaldeko 19:30ean Amurrioko antzokian Begibistan jaialdiari hasiera eman zaio.
Ekitaldiaren atarikoan “Amurrianos en el mundo” izeneko dokumental-itxura duen humerezko bideoa ikusi ahal izan dugu. Horren sona handia lortu duten zenbait telesaioren parodia honetako protagonistak jaialdiaren aurkezpena burutu du.
Jarraian Kepa Sojok, emanaldiko zuzendariak, joandako guztioi ongietorria egin digu, Amurrioko alkatea den Pablo Isasiri hitza emanez, zeinak, besteak beste, aurtengo zinema astean 90 laburmetraia ikusteko parada izango dugula jakinarazi digun.
Ofibistan sail ofizialean parte hartuko duten zenbait lanen irudiez osaturiko bideo ikusi dugu ondoren. Gosegarri honi esker, aurtengo edizioan barietatea izango dela nagusi baieztatu ahal izan dugu.
Begibistan jaialdiak, bestalde, Euskadiko Filmotekarekin elkarlanean aritzeko asmoa berretsi du. Gogo honen emaitza izan da “Gente de mar” izeneko laburmetraia ikusi ahal izatea. Carlos de los Llanosek 1957an zuzendu zuen film honek arrantzaleen bizimoduaren berri ematen digu, hala itsasoan, nola lehorrean. Interesgarria bene-benetan!
Irekiera-gala hau soinu-banden inguruko kontzertu batekin amaitu da. Kontzertuaren hastapenean haur-abesbatza batek, instrumentu-talde desberdin zein filmen irudiez lagunduta, zenbait umeentzako pelikulen soinu bandak interpretatu ditu, hala nola, El Libro de la Selva, Mary Poppins... Segidan, helduentzako pelikulen txanda iritsi da. Lanen irudiak ikusi ditugun bitartean, Farinelli “Il Castrato”, Pat Garret y Billy “The Kid”, El Cartero y Pablo Neruda, Kutsidazu Bidea, Ixabel eta El Padrino pelikulen musika zoragarrirekin gozatu ederra hartu dugu! Hortaz, egile oso desberdinek sortutako musika taularatu dute, besteak beste, Haendel, Nino Rota, Robert Sherman edo Bob Dylan.
Ederto hasi egin da, beraz, aurtengo Amurrioko zinema astea! Bide beretik segitzea espero dugu.