Lehenengo ostegunean, hilak 22, Basalarrina elkarteak Laudion duen egoitzan “Laburbira- Film laburren VII. zirkuitua”-z gozatzeko aukera izan genuen. Ekitaldiak, funtsean, hainbat laburmetraien proiekzioa eta gonbidatu batzuen adierazpenak bildu zituen.
Laburmetraiak 9 izan ziren eta, soinu-arazoak tartean, nola denetarik egon zen, oro har zapore nahiko goxoa utzi ziguten. Ikusteko parada izan genituen lanak honako hauek izan ziren:
-Ahate pasa (Koldo Almandoz) 12 minutuko lan bitxia eta, nire uste apalean behintzat, interesgarria. Dokumental itxura du.
-Zorion hutsa (Estibaliz Ariz, Itziar Faido, Janire Fernández, Vanessa Martín, Gorka Montiel eta Malen Ulaiza) 13 minutuko filmea, egitura bitxia eta aktore ezagunak biltzen dituena. Drama hutsa da.
-Nora Zoaz (Iñigo Sanz) 4 minutuko Josu Bergararen kantu izenkide baten bideoklipa.
-Clark & Boris (José Luis Barredo eta Iñigo García) 11 minutu eta erdiko ondo ulertutako adar jotze bat. Superman pertsonaiaren beste ikuspuntu bat eskeintzen diguna.
-Odisea etxaldean (Urko Mauduit Eta Ioseba Salaberri) Animazio-pelikula, 4 minutu irauten duena, eta “2001, espazio-odisea” Kubricken lanaren omenaldi gisa uler daitekeena.
-Kameratoian saria lorturiko lan biak: Nireak dira! (Aimar Ruiz, Naiara Gonzalez, Naiara Ortega, Erika Elizari, Zain Gonzalez, Mikel Dominguez, Iñaki Larrañaga eta Liher Puente) lehen saria eskuratu zuen umorea darabilen 2 minutuko lana, batetik, eta, bestetik, Neguko hitzak (Maddi Barber, Libe Larrarte, Andrea Galbete eta Garazi Abrisketa) bigarren saria erdietsi zuen 3 minutu eta 20 segunduko lan ilunagoa.
-Esaiok (Arkaitz Bazterra) 7 minutuko lana guztion bihotzera iritsi zena, gehienok geure burua islaturik ikusi genuelako.
-Amona putz (Telmo Esnal) Barrez lehertzeko moduko 9 minutu paregabeak, egia esateko.
Bada, laburmetraia hauek guztiak ikusi ondoren, Maddi Barber eta Garazi Abrisketaren adierazpen interesgarriekin gozatzen segitzeko abagunea izan genuen. Kameratoian bigarren saria eskuratutakoak dira biak Neguko hitzak euren lanari esker eta izan zuten esperientziaren berri eman ziguten. Kameratoia zer kontxo den jakin nahi baduzue, bertan duzuen audio-esteka klikatu besterik ez duzue egin behar.
Gure herrian ez dira asko era honetako ekitaldiak eta, beraz, dauden apurrak zaintzeko modukoak direla uste dut. Hori dela eta, geure txoko honetan lekutxoa egitea ideia ona iruditu zait, ez al duzue uste?