LA CINTA BLANCA (ZINTA ZURIA)
“Zinta zuria” (Austria, 2009) izeneko pelikula gizarte baten disekzioa da, gizatalde hori hobeto eta sakonago ezagutzen baimentzen diguna. Hori, berez, nahiko interesgarria da, baina gizarte horretan, pelikularen inongo momentutan aipatzen ez den arren, “nazismo”aren sorrera gertatuko dela baldin eta badakigu, interesgarri baino ezinbesteko bilakatzen da.
Nahiz eta kontatzen digutena desatsegina izan, ikusten duguna gogorregia bada ere, egungo gizaki batek onar dezakeen beheramendu-maila errez gainditzen duen arren... ikusi beharreko pelikula dugu hau.
Beti esan da, arrazio osoz, ahazten ditugun gauzak errepikatzeko arrisku handia dagoela. Errepika daitezkeen kontuak pelikula honetan kontatzen direnak badira, aukera horri inongo aterik ez zabaltzea funtsezkoa da.
Ez da komeni ahaztea gizarte baten liderren agintea ukaezina bada, jende horren patua lider horien nahieraren arabera diseinatuko dela, euren buruaren jabe ez direla izango eta inposatzen dietena baino ez dutela pentsatuko... laburbilduz, diktadura kudrel batenpean biziko direla.
Haneke jaunak ekoiztu duen amezgaizto honek oso egitura bitxia dauka. Hasteko zuribeltzean filmatuta dago. Ez da hau, ezta hurrik eman ere, edonola hartutako erabakia. Ondo baino hobeto pentsatuta dago, deliberamendu guztiz kontzientea da. Era honetan, pertsonaiak, egoerak, pelikularen giroa... are sinesgarriago bilakatzen dira.
Beste errekurtso bat offeko ahotsa dugu. Neuk pelikula bikoiztuta ikusi dut eta aukeratu duten ahotsa ezin aproposagoa dela esan behar dut. Ipuin bat kontatzen ari dela ematen du. Hori bai, lehenengo pertsonan kontaturiko ipuina. Narratzaileak oso era lasaian hitz egiten du, kontatzen duen guztia itzelezko astakeria bada ere.
Bestalde, offeko ahotasaren nolabaiteko goxotasun horri esker zein zuzendariak darabilen planifikazioari esker, non pasarterik gogorrenak planotik kanpo gertatzen diren, pelikularen liseriketa arintzen zaigu, apur batean baino ez bada ere.
Bukatzeko, ezin kronika hau amaitu aktoreen lan zoragarria aipatu gabe utziz. Haiek dira, hein handi batean behintzat, pelikula sinesgarri bihurtzen dutenak, nahitaezko baldintza era honetako ekoizpen batean.
Pelikula guztiekin egitea gustatuko litzaidakeen arren, kasu honetan bereziki interesatzen zait zuon iritzia. Primeran legoke zuon iruzkinak irakurtzea. Animatu beraz, filma ikusi eta gure txoko txiki honetan parte hartu zuon ahotsak entzun daitezen. Ez ahaztu pelikularen mezua: Ez utzi besteoi geure iritzia inposatzen!
Fitxa teknikoa
Jatorrizko izenburua: Das weisse Band
Zuzendaria: Michael Haneke
Gidoilaria: Michael Haneke
Aktoreak: Susanne Lothar, Ulrich Tukur, Josef Bierbichler...
Herrialdea: Austria
Iraupena: 145 minutu
Ekoizpen-urtea: 2009