Aste honetan Álex de la Iglesiaren azken pelikula nahi dizuet gomendatu, “El Bar” (2017) izenekoa. Zinta honen inguruan esan daitekeen laudoriorik handiena zera da: sortzailearen produktu peto-petoa dela, alegia. Izan ere, Bilbon munduratu zenzinemagilearen lan gehienetan gertatzen den bezala, honetan ere abiapuntu interesgarri bat duen istorio bat topatuko dugu, ederto baino hobeto filmaturik dagoena gainera; indar handiko irudiak nonahi aurkituko ditugu metrajean zehar, zuzendariak propio duen neurrigabekeria ahaztu gabe, noski. Hitz batez, Álexen pelikula bat.
Goizeko bederatzietan euren artean zerikusirik ez duten morroi talde bat ari da gosaltzen Madrilgo taberna batean. Tupustean, haietako bat ostatutik irtengo da, buruan tiro bat jasotzeko.
Ohi den moduan, zuzentzeaz gain, Jorge Guerricaechevarriarekin batera, gidoia idazteaz ere arduratu egin da de la Iglesia jauna. Askotxo dira dagoeneko zuzendari bilbotarrak burutu dituen lanak. Nire uste apalean, oraindik ere “El Día De La Bestia” (1995) da Álexen pelikularik borobilena, baina azken honekin, “La Comunidad” (2000) izeneko lanarekin gertatu zitzaidan bezalaxe, gozatu ederra hartu egin dut.