Aste honetan gomendatu nahi dizuedan pelikula ezin izango duzue zine-aretoetan ikusi. Izan ere, Alberto Rodríguezen “Grupo 7” (2012) izeneko lana estreinatu egin zenetik urte batzuk pasa dira jada. Hala eta guztiz ere, zinta hau ederto baino hobeto zahartu egin da. Filme gogorra bezain gordina dugu Sevillako zinemagilearena, izugarrizko indarra duten irudiez josia, non pantaila erraldoian iradokitzen denak ikusten denak baino areago mintzen zaituen.
Sevilla hirian 1992an burutu zen mundu mailako erakusketarako prestaketa lanetan girotuta dagoen thriller honetan poliziaren ustelkeria era esplizituan erakusten da. Bi Goya sari irabazita dituen pelikula honek ikuslearen begien aurrean jartzen ditu batere atseginak ez diren leku zein egoerak, dotorezia osoz gainera. Kontraesan hau dugu, bestalde, zinta honen indarguneetako bat, nire ustetan behintzat.
Aipatu bezala, Alberto Rodríguez da filme honen zuzendaria. Sevillan jaio zen zinemagile honek baditu beste zenbait zinta guztiz estimagarriak direnak, hala nola, “La Isla Mínima” (2014) edo “El Hombre De Las Mil Caras” (2016).
Ohi duen bezala, lan honetan ere aktore-multzo bikaina bildu egin zuen. Nik uste, bai Antonio de la Torrek, bai Mario Casasekkarekterizazio bikainak burutzen dituztela.