Aste honetan, Steven Spielbergen azken pelikula, “The Post” (2017) izenekoa alegia, gomendatu nahi dizuet. Ohion munduratu zen zuzendariak estrainekoz kazetaritza protagonista duen bilbe bati heldu dio, nola heldu gainera! Ikuslea bere jezarlekuan itsatsita mantentzen duen lan baten aurrean gaude. Asko dira filme honek dituen indarguneak, hala nola, erritmo egokia, narrazioaren interes ukaezina, aktoreen lan txukuna, elkarrizketen aberastasuna… laburbilduz, zinez merezi duen zinta dugu Hollywoodeko Midas erregearen azken hau.
The New York Times eta The Washinton Post egunkariek 1971n Vietnamgo gerraren inguruko isilpeko dokumentuak argitara ematea erabaki zutenean, adierazpen-askatasunari buruzko eztabaida sutsua abiatu zen Auzitegi Gorenean amaitu zena.
Cincinnatin munduratu zen film zuzendariak lan bikaina burutu du kameren atzean kokatuta non, zirujau baten zehaztasunez, gure begien aurrean jartzen baitu nahiko korapilatsua den historiako pasartea.
Hala eta guztiz ere, istorio borobil honetaz gozatzea badugu, aktore-multzo bikain bati esker dela esan behar da. Izan ere, haiek dira pelikulari sinesgarritasuna ematen diotenak. Meryl Streep eta Tom Hanksen jardunak txapela kentzeko moduak dira.