Aste honetan, zinez ederra den pelikula bat nahi dizuet gomendatu: zein eta “Coco” (2017) izenekoa. Lan honek hainbat balore garatzen ditu, hala nola, memoria, familia, kultura… Bestalde, bisualki indar izugarria duen zinta txundigarri honek, gidoi borobil batez baliatuz, guretzako arrotza den kultura bat hurbiltzen digu, Mexikokoa alegia.
Bere familia aurka badu ere, Miguelen ametsa musika munduko izar bilakatzea da. Grina honek “Tierra de los muertos” delakoan sartzera behartuko du, non bere familiaren benetako historia ezagutuko duen.
Nire uste apalean, Pixar eta gainerako estudioen artean oraindik ere tarte handia dago. Teknikoki hainbat urrats aurretik daude oraindik ere eta, nire ustetan garrantzitsuena dena, kontatzeko dituzten istorioak askoz hobeak dira. Hau dela eta, filme benetan borobilak burutzen dituzte normalean eta zinta hau ez da salbuespen bat, ez horixe!
Pelikula itxura duen mirari honen atzean Lee Unkrich eta Adrián Molina daude. Hauxe Molinaren lehen film luzea dugu, baina Unkrichek eskarmentu handia du bitxiak sortzeko makina den Pixar ekoiztetxean. “Toy Story 2” (1999), “Monsters, Inc” (2001), “Finding Nemo” (2003) edota “Toy Story 3” (2010) bezalako zinta borobiletan parte hartu izan du Clevelanden munduratu zen zinemagileak.