Aste honetan, dagoeneko karteldegian ez dagoen pelikula bat nahi dizuet gomendatu, Kathryn Bigelow zuzendari amerikarraren azken lana, zein eta “Detroit” (2017) izenekoa. Bigelow oso zuzendari trebea da ekintza-filmeak egiten. Izan ere, kamera oso ondo mugitu egiten du, iaioa da kamera-urduriaren laguntzaz ikuslea istorioan sartzen, alde egiteko inolako aukerarik eman gabe, gainera. Zinta honek, inondik ere, Kathrynen zineak dituen ezaugarri nagusiak barnebiltzen ditu: istorio interesgarri bat kontatzen du, egitan gertatutakoa gainera, ekintza sekuentziak ederto daude burutuak, tentsioari eutsi egiten dio arazo barik… laburbilduz, nortasun handiko zuzendari baten ekoizpen duinaren aurrean gaudela.
Lan honek 1967ko uztailean Detroit hirian gertatu ziren istiluetan dago girotuta, garai hartan guda egoerarekin alderatu zirenak. Zinta honetan egin den giropena bikaina da; ederto islatzen da, bai garai hartako bizimodua, bai eta une hartako indarkeria ere. Izan ere, garaiko beltzen egoera zinez onartezina baitzen.
“Detroit” (2017) hau Kathryn Bigelowren 10. film luzea dugu. Kaliforniako zinemagileak baditu, nire ustetan behinik behin, zenbait pelikula estimagarri, hala nola, “Días extraños” (1995), “En tierra hostil” (2008) edo “ La noche más oscura” (2012).