Aste honetan Rodrigo Sorogoyen zinemagile madrildarraren azken pelikula nahi dizuet gomendatu, “El Reino” (2018) izenekoa alegia. Egia da, zinta ikusten ari zaren bitartean, hainbat unetan pelikula bat barik, teleberria ikusten ari zarelako sentsazioa duzula. Izan ere, pantaila erraldoian gertatzen den guztiak egunero etxeko telebistan ikusten duguna ematen baitu. Sorogoyenek, baina, erabat asmatu du lanari eman dion ukituarekin. Gaur egungo bizitzak daraman abiadura bera du pelikulak, denbora gutxian gauza asko gertatzen dira eta. Honek zintari erritmo oso bizia ematen dio, ikusleak butakan iltzatuko duena.
Etorkizun ezin hobea duen politiko batek, ustelkeria kasu bat dela bide, dena galduko du. Izan ere, alderdikideek ez diote inolako babesik emango eta, noski, honek guztiak, bere karreraren amaiera ekarriko du.
Sorogoyenen hirugarren film luzea dugu hau. Beste zeregin batzuetan murgildurik ibili izan den arren, pantaila handirako burutu dituen lanak izan dira bere ekoizpenik onenak, duda barik. Bere aurreko zinta, “Que Dios nos Perdone” (2016) delako pelikulak kritika zein ikusleen harrera oso ona jaso izan zuen, hainbat sari irabaziz gainera.
Azken bolada honetan zuzendaria eta Antonio de la Torre antzezlearen arteko kolaborazioa emaitza izugarri onak ari da ematen.
Jatorrizko izenburua: El Reino
Zuzendaria: Rodrigo Sorogoyen
Gidoilaria: Isabel Peña, Rodrigo Sorogoyen
Antzezleak: Antonio de la Torre, Josep María Pou, Nacho Fresneda
Herrialdea: Espainia
Ekoizpen-urtea: 2018
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide