Aste honetan, Madrilen munduratu zen Salvador Calvo zuzendariaren azken pelikula nahi dizuet gomendatu, “Adú” (2020) izeneko filma, alegia. Puzzle baten antza duen zinta baten aurrean gaude, non hiru istorio desberdin nahasten diren. Erabat beharrezkoa den pelikula dugu hau horren ondo bizi garenok, gugandik oso gertu dagoen eta ikusi nahi ez dugun miseria badela ahaz ez dezagun.
Zuzendariaren bigarren film luzea da gomandatzen ari garen hau. Izan ere, bere ibilbide profesionalean gehienbat telebistan aritu da eta. Zinearen munduan oso aritua ez izanda ere, errodatzeko modu sendoa duela onartu behar zaio madrildarrari. Hiru istorioen arteko oreka oso da egokia, tentsioa une oro mantentzen da eta, nahiz eta kontakizunak etengabe nahasten dituen, ikuslea ez da inoiz galtzen.
Esan bezala, Salvador Calvoren bigarren pelikula da “Adú” (2020) hau. Bere debuta “1898, Los Últimos de Filipinas” (2016) izeneko filmarekin izan zen.
Aipatutako lan bietan Luis Tosar aktore handia agertzen da, hortaz zuzendariaren antzezle fetitxea dela esan daiteke. Izen handien zerrenda osatzeko Anna Castillo Bartzelonako aktorea dugu. Gainerako antzezlariek, horren ezagunak ez diren arren, nabarmentzeko moduko lana burutzen dute inolako zalantzarik gabe.