Berrogeialdi luze, astun eta nahasgarri hau, ahal den neurrian behinik behin, hobeto eramaten lagundu ahal digu, duda barik gainera, maisu erraldoia den Billy Wilderjaun txit gorenak. Egungo Polonian munduratu zen jenio honen pelikula bat nahi dizuet gomendatu aste honetan, zein eta “One, Two, Three” (1961) izeneko harribitxi hau. Indargunez jositako lana dugu hau, hala nola, gidoi borobila du, elkarrizketa adimentsuak nonahi topa ditzakegu, ironia dario poro guztietatik, antzezpen bikainak barnebiltzen ditu… hots, behin eta berriro ikusteko moduko film batez ari gara.
Gerra Hotza izenarekin ezagutzen den garaian kokatzen da kontakizuna. Izen handiko freskagarri baterako lanean diharduen ordezkari bati bere gustukoa ez den mandatu bat egokituko dio nagusiak. Hortik aurrera ezin konta ahala korapilo sortuko dira. Lan honen erritmoa zinez frenetikoa dela.
Esan bezala, produktu bikain honen atzean Billy Wilder handia dago. Zinemagile honen filmografia emankor bezain borobila da, ezinezkoa da bere lan bikainak aipatu baten bat ahaztu barik.
Bestalde, zinta handi honetan aritzen diren antzezleen lana nabarmendu behar da, inolako zalantza barik. Den-denak izugarri ondo dauden arren, azpimarratu nahi nituzke bai James Cagney bai eta Pamela Tiffin handien antzezpenak.