Carol

Aste honetan, duela urte batzuk, ez asko, estreinatu zen pelikula bat nahi dizuet gomendatu, zein eta “Carol” (2015) izenekoa, alegia. Zinta britaniarra den arren, Los Angeles hirian munduratu zen Todd Haynes zuzendari entzutetsuak zuzendu zuen. Nire uste apalean oso pelikula dotorea da. Elementu asko ditu era positiboan baloratua izateko, hala nola, eszenaratze doitua, behar dena erakusten duen kameraren kokapena, gidoi bikaina eta interpretazio borobilak… ezin hobeto girotuta dago eta behar den bezala jartzen du mahai gainean polemika handia sortzen duen gaia. 

Bizitza hobea izateko jomuga duen emakume gazte batek oso sofistikatua den beste bat ezagutuko du. Hasiera-hasieratik bien artean zerbait sortuko da, zeinak bion bizitzak goitik behera aldatuko duen.

Tebistarako zein pantaila erraldoian estreinatzeko lanak burutu dituen zinemagile interesgarri honek baditu estimu handiko hainbat ekoizpen. Euren artean ditugu, esate baterako, “Far From Heaven” (2002) edo nire ustetan oso estimagarria den “I´m Not There” (2007), Dylan-en inguruan errodatu zuen erretratua. 

Esan bezala, film honetan asko dira topa ditzakegun indarguneak, baina guztien artean garrantzitsuena seguruenik, bai Cate Blanchett-ek, bai Rooney Mara-k burutzen duten lana dugu.