Ez dira asko pelikula bat euskaraz gozatzeko ditugun aukerak, horregatik dauden apur horiek baliatzea komeni da. Aste honetan, Mireia Gabilondo Bergarako zuzendariaren azken lana nahi dizuet gomendatu, zein eta “Erlauntza” (2020) izenekoa alegia. Pelikula barregarria dugu hau, pentsatzeko bidea ere ematen duena, zenbait metafora erabiltzen ditu eta. Une gogorrak algaraka ibiltzekoekin ondo nahasturik daude. Bestalde, zuzendariak, kemeraren atzetik eskarmentu eskasa izanda ere, ogibidea ezagutzen duela argi uzten du muntaketa egokia pantailaratuz.
Neska lagun talde bat haietako baten agurra ospatzeko landetxe batean elkartuko da. Denbora luze pasa da, ordea, elkar ikusi gabe eta, noski, dagoeneko gauzak ez dira betidanik izan diren modukoak. Horra hor abiapuntu interesgarri bat, zuzendariak ederto baliatuko duena komedia mingots bat eraikitzeko.
Mireia Gabilondo emakumezko aktorea izateaz gain, beste batzuekin batera, kameraren atzean ere kokatu izan da zenbait proiektutan. Bera bakarrik, baina, gomendatzen ari garen film honez gain, beste bat ere burutua du: “Amaren eskuak” (2013), hain zuzen ere.
Era honetako proiektu bat arrakastatsua izan dadin, ezinbestekoa da aktoreen jardun egokia eta, duda barik, pelikula honetan baldintza hori ondo baino hobeto betetzen da, aktore-multzo osoak lan egokia burutzen du eta.