Betidanik izan dut oso gustuko Argentinan egiten den zinema. Oso nolakotasun zehatzak eta, nire iritziz behinik behin, inbidiagarriak erabat. Nolakotasun horiek oso lotuta daude haien hizkerarekin. Horren da musikala haien hitz egiteko era ezen, edozein astakeria esatean ere, haien diskurtsoa gozagarria baita. Horrez gain, gaurkoan gomendatu nahi dizuedan pelikula, “El Amor Menos Pensado” (2018) delakoa, zuzendari baten estraineko pelikula izateko, baditu bestelako ezaugarri positiboak, hala nola, erritmo egokia, kontatu nahi duena era argi eta ulergarri batean iruditan jartzen jakitea edota ikuslearekiko begirunea zer den argi izatea.
Denbora luze elkarrekin eman ondoren, bikote bat banatuko da. Hasiera batean, euren egoera berria kitzikagarria iruditzen bazaie ere, denborak aurrera egin ahala, nolabaiteko etsipena sentituko dute. Honen azken emaitza nahiko txundigarria izango delarik.
Pelikula hau, esan bezala, Juan Vera gidoilari argentiniarraren lehenengo lana dugu zuzendari gisa. Nabaritzen da, halere, eskarmentu handia duela gidoilari lanetan.
Zinta honek, ordea, asko die eskertzeko aktoreen zerrendan agertzen diren profesionalei. Izan ere, ohi duten bezala, lan izugarria burutzen dute, doitasun eta profesionaltasunez betea.