Zinema independenteak arraskasta izugarria eskuratu du azken Goya sarietan, bai eta euskaraz errodatutakoak ere. Duela gutxi “Akelarre” (2020) film interesgarria gomendatu nizuen eta gaurkoan, gala hartan emaitza bikainak lortu zituen beste zinta bat dakart, zein eta “Ane” (2020) izenekoa. Pelikula biak, oso desberdinak diren garaietan girotuta dauden arren, indargune bat partekatzen dute nire uste apalean: lan bietan girotze lan ederra dago eginda, kontatzen dituzten istorioei sinesgarritasun handia ematen diena. Biek ala biek denontzako oso balekoa den ekarpen bat egiten dute, garai baten inguruko testigantza doitua eskaintzea, alegia.
Alaba etxera lo egitera ez datorren batean ama bere bila hasiko da, bai eta bere bizitzaren inguruan zenbait kontu ezagutzen hasi ere. Horri esker, ezezagun batekin bizi dela jakingo du.
Sano gomendagarria den zinta honen zuzendaria David P. Sañudo da. Bilbon munduratu zen zinemagileak estreinako film luzea du gomedatzen ari garen hau. Hainbat metraje laburreko filmak ditu errodaturik Bilboko zuzendariak, bai eta aste honetan gomendatzen dizuedan pelikula honen izenkidea den bat ere.
Nabarmentzekoak dira, duda barik, aktoreen jardunak kasu honetan. Izan ere, sari desberdinetan, Goya edo Feroz sarietan besteak beste, hala onartu zaio lan honi zenbait premio banatuta.