Aste honetan, Lee Isaac Chung zinemagile amerikarraren azken lana gomendatu nahi dizuet, zein eta “Minari. Historia de mi familia” (2020) izenekoa. Denver hirian jaiotako zuzendariak badu jatorri korearra eta, duda barik, lan honek badu ukitu autobiografikoa. Ez da harritzekoa, beraz, pantaila erraldoian ikusten dugun guztiak sinesgarritasun izugarria izatea, zuzendariak zertaz ari den badaki eta.
Pelikula honetan zera kontatzen digute: ume batzuek itzelezko aldaketa somatuko dute euren bizitzan gurasoek, aitak zehatzago esanda, hartu duten erabaki bat dela eta. Ideia honek mila gauza era berezi batean kontatzeko abagunea emango dio pelikula honen sortzaileari. Pertsona honen ikuspegia da, nire uste apalean behinik behin, zinta honi duen originaltasuna ematen diona. Izan ere, “American way Of life” izenekoari kulturalki beste ikuspegi bat ematen baitio. Pelikulak era adimentsuan aztertzen du kultura desberdinen arteko talka.
Film honek sei izendapen ditu Oscar sarietarako, bai eta izen eta onarpen hendiko beste sari batzuetarako ere. Ez gaude oso ibilbide emankorra duen zinemagile baten aurrean, baina, ezbairik gabe, kalitate maila minimo bat bermatzen duen artista bat dugu mintzagai.