Aste honetan, Robert Eggers zinemagile estatubatuarraren azken lana nahi dizuet gomendatu, zein eta “The Lighthouse” (2019) izenekoa, alegia. Aitortu beharra daukat beldurrezko pelikulak ez ditudala bereziki gustuko. Hala eta guztiz ere, kasu honetan Strafford konderrian munduratu zen zuzendariak egin duen planteamendua oso erakargarria egin zait. Hasteko, zuri-beltzean errodatutako filma dugu hau, berez estilo-hautu interesgarria dena. Eta ez hori bakarrik, pertsonaien aurkezpen eta deskribapena erabat fisikoa da. Tarte horretan, izatez, apenas ez dago dialogorik, den-dena halere ederto azalduta dago irudi esanguratsuen bidez.
Pelikula hau, azken batean, muturreko egoeretan pertsonen arteko harremanen analisi sakon bezain adierazgarria dugu. Zinema-aretoko besaulkian iltzaturik uzten zaituen kontakizun honen ezaugarririk nabariena, nire ustez behinik behin, uneoro sortzen duen artegatasuna da.
Lan honen atzean ibilbide profesional laburra duen zuzendari bat dugu. Izan ere, hau kenduta, beste film luze bat besterik ez baitu, “The Witch” (2015) deiturikoa, beste beldurrezko pelikula bat. Gainera, bi film labur ere baditu ekoizturik. Esan beharra dago, hala ere, bere bi pelikulek oihartzuna izan dutela, zeren eta izendapen zein sariak eskuratu baitituzte zinemaldi desberdinetan, gehienbat berak jorratzen duen estiloan berezituetan.
Bukatzeko, pelikula honetan aritzen diren bi aktore erraldoien karakterizazio bikainak nabarmendu behar ditugu. Bai Willem Dafoek, bai Robert Pattinsonek, txapela kentzeko moduko lana burutzen dute.