Aste honetan, David Fincher Denver hirian zertu zen zuzendariaren azken pelikula nahi dizuet gomendatu, zein eta “Mank” (2020) izenekoa. Lan interesgarri bezain miresgarri honetan ez dira gutxi topatzen ditugun indarguneak: girotze lana izugarria da, elkarrizketa bakoitzean izkutatzen den garraztasuna erabat laudagarria dugu, aktoreen lan bikaina, irudi-bidez istorio bat kontatzeko zuzendariak erakusten duen ohiko maisutasuna… laburbilduz, film hau ikustea erabakitzen baduzu, ez zaizu damutuko.
Bere aitak idatzitako gidoian oinarritzen den zinta honetan Fincherrek Herman J. Mankiewicz gidoilariaren bizitzaren hainbat pasarte kontatzen ditu, “Citizen Kane” (1941) lan handiaren gidoia idazten ibili zen urteetakoak alegia.
Dagoeneko aipatu den bezala, David Fincher dugu pelikula honen zuzendaria. Netflix konpainiak ekoiztu zuen lan honek 10 izendapen erdietsi zituen Oscar sarietan, bi premio eskuratuta: argazkigintza onena eta zuzendaritza artistiko onena.
Nahiz eta egindako lanak ez zuen merezitako onarpena lortu, ezin gomendio hau bukatu Gary Oldman handiak buruturiko karakterizazio ahaztezina aipatu gabe. Egia da, urte berean “The father” (2020) zintako Anthony Hopkins bikaina izan zuela lehiakide, eta hori ez da ahuntzaren gauerdiko eztula.