Aste honetan Paul Thomas Anderson Los Angeles hirian jaio zen zinemagilearen azken pelikula nahi dizuet gomendatu, zein eta “Licorice Pizza” (2021) izenekoa alegia. Azken Oscar sarietan hiru izendapen izan eta esku-hutsik irten zen zinta interesgarri honetan estimatzeko kontu asko topa ditzakegu, hala nola, egitura formal hausnartu bezain borobila, planoen antolamendu landua, irudien erabilera egokia, irudi bidez kontzeptuak plazaratzeko gaitasuna… Benetako autore baten aurrean gaudela esan dezakegu inolako beldurrik gabe. beste kontu bat izango da, ikusle gisa tankera zein tonuera honetako filmak gustuko ditugun ala ez.
Lan honetan zuzendariak pertsonaia nagusien harremana doitasun handiz aztertuko du, bisturi bat erabiliko balu bezala.
Kameraren atzean, dagoeneko esan dugun moduan, Paul Thomas Anderson dugu. Zuzendari honek bideo musikal gehiago ditu pelikulak baino; baina egia esate aldera, bere ibilbidean tankera desbedineko film estimagarriak burutu ditu. Bereak ditugu, besteak beste, “Boogie Nights” (1997), “Magnolia” (1999) edota “Pozos de Ambición” (2007).
Era honetako film batean antzezleen karakterizazioak ezinbestekoak dira sinesgarritasuna lortzeko eta, nire ustez behinek behin, hala gertatu egin da oraingo honetan. Bai Alana Haim, bai Cooper Hoffman, ondo baino hobeto aritzen dira haien rolak defendatzen.