Aste honetan, Oscar sarietan izendapen gehien dituen pelikula nahi dizuet gomendatu. Zein eta “Todo a la vez en todas partes” (2022) izeneko lana. Aurreko datua nahiko harrigarria da. Izan ere, ez baitauka batere antzik normalean sariak eskuratu izan dituzten filmekin. Sariak aparte utzita, proposamen desberdin eta berri baten aurrean gaudela esan beharra dago. Hurbilduko den ikusleak zera izan behar du argi: lanaz gozatu ahal izateko onartu beharreko berezko arauak dituen zerbaiti egin behar diola aurre. Eta hobe du hasieratik premisa honi men egitea, bestela ez baitu merezi pelikula ikusteko ahalegina egitea.
Atsedenik ez duen tramankulu honek ahalegin bat eskatzen dio ikusleari. Joko honetan sartuko denak merezitako premio gozoa lortuko du. Zenbait unetan begien aurrean agertzen zaiguna zinez estimulagarria da. Azken batean, zinta desberdinak bere barnean gordetzen dituen film baten aurrean gaudela esan daiteke.
Pelikula honen atzean bi zuzendari ditugu, nahiz eta beti elkarrekin lan egiten duten. Are gehiago Daniels ezizenez ezagutzen ditugu. Goitizen horren azpian Dan Kwan eta Daniel Scheinert ditugu. Hasiera batean musika-bideoak eta film laburrak ekoiztu zituzten eta orain lan bizigarri honen arduradunak dira, haien bigarren pelikula dena.
Amaitzeko, nabarmendu nahiko nuke pelikula honi esker Jamie Lee Curtis antzezle beteranoak Oscar sarietan bere lehenengo izendapena lortu duela.