Aste honetan, Rodrigo Sorogoyen Madrilgo zinemagilearen azken pelikula nahi dizuet gomendatu, zein eta “As Bestas” (2022) izeneko lan interesgarria. Western moduko pelikula honek indargune asko ditu: ikuslearen ezinegonari eusten dio etengabe, fotograma guztiak bustitzen dituen giro itogarriak ez du apenas bakerik ematen, planifikazio pentsatu eta doitua da, zuzendariaren trebeziari esker ikuslea ez da inongo momentutan galtzen, kamerak beti hartzen du lekurik egokiena… Honi esker, lan luzea den arren, ikuslearen sentsazioa ziztu bizian gertatzen den istorio baten aurrean dagoena da. Hori bai, zintak kontatzen duena horren da gogorra, ezen ikustera joateko eguna mimo handiz aukeratu behar baita. Ikuslearen gorputzaldiak esperientzia filmikoa baldintza dezake, nire ustez. Izan ere, film asaldatzaile baten aurrean gaude.
Nire uste apalean, Rodrigo Sorogoyenek baditu minimo beste bi zinta handi: alde batetik, “Que Dios Nos Perdone” (2016) eta, bestetik, “El Reino” (2018). Gainera, nire ustetan, kalitate handiko ekoizpen hau denboran nahiko kontzentratuta dago eta berriki ekoiztutako lanetan ematen da. Beste era batean esanda, une oso egokian dagoen artista bati buruz ari garela. Eta gainera, bere jarduna ikusle zein kritikaren onarpena ari da izaten. Sarrera dezente saltzeaz gain, bere pelikulek sari eta izandapenak bildumatzen dituzte.
Amaitzeko, aktoreak zuzentzen Rodrigo Sorogoyenen iaiotasuna nabarmendu nahiko nuke. Egia da, aktoreak aukeratzen ere oso ona dela, seguruenik bere lana erraztuko duena, baina bere pelikuletan antzezleen lanak beti izaten dira sarituak, horretan berak ere zerikusia izango duela pentsatu nahi dut.