Aste honetan, Marina Sereseskyren, Argentinan munduratu zen zinemagilearen, azken pelikula nahi dizuet gomendatu, zein eta “Empieza el baile” (2023) izenekoa alegia. Aitortu behar dut pilo bat gustzatzen zaidala Argentinako zinea. Oso elkarrizketa burutsuak dituztela iruditzen zait. Hain da musikala beren hitz egiteko modua, ezen, iraintzen dutenean ere, badirudi zerbait polita ari direla esaten. Gehitu horri duten umore ukitu berezia eta atsegin handiz ikusten den pelikula bat duzu aurrean.
Marina Sereseskyk film honetan desioaren inguruan saiakera sakon eta potentea planteatzen du. Zinta ederra da, oso era adimentsuan kontatuta dagoena. Gidoian gordetzen dituen tarte batzuk oso barregarriak izateaz gain, erabat adierazgarriak ere badira, emozioa oso ondo transmititzen asmatzen du. Gizakion harremanen inguruko oso lan interesgarria da, disekzio lan bikaina, alajaina!
Hori bai, hau guztia egiten oso zaila den arren, pantaila handian aritzen diren profesional handiei esker, zerbait erraza eta naturala dela dirudi, gezurra dena. Izan ere, bai Dario Grandinettik, bai Mercedes Moránek, sinesgarritasunez beteriko antzezpenak burutzen dituzte istorio hau eginatzekoa bihurtuz.
Zuzendariaren hirugarren film luzea da hau, etorkizunean eskainiko diguna aditasunez jarraitzea komeni dela uste dut.