Aste honetan, J. A. Bayona Bartzelona hirian jaio zen zuzendariaren azken lana nahi dizuet gomendatu; zein eta “La Sociedad de la Nieve” (2023) izenekoa, alegia. Lan honek bere aurka dauka gertaera bera kontatzen duen beste bat dagoeneko existitzen dela. Hala ere, eta meritu handikoa da, filma ikusleaz jabetzen da une oro. Ederto kontatuta dago, murgiltze-esperientzia zoragarria da, pantaila erraldoian ikusten duguna sentitu dezakegu, hainbatetan oso desatsegina dena. Zorionez, zuzendariak mezua dotorezia handiz helarazten digu.
Lan honen erantzukizunik handiena, gorago aipatu den bezala, J. A. Bayonarena da; pelikula zuzentzeaz gain, gidoia idazten ere lagundu baitu. Nire uste apalean, Bartzelonako zuzendariak talentu hadia duen arren, ez du beti asmatu aukeratu dituen proiektuekin. Bere aurreko lanen artean, “El orfanato” (2007), “Lo Imposible” (2012) edota “Un Monstruo Viene a Verme” (2016) bezalako pelikula interesgarri bezain irregularrak ditugu. Nire ustetan, bere lan guztietan goza daiteke zuzendariaren trebetasunaz, baina azken emaitzak ez dira guztiz borobilak. Hala ere, nire iritzia baino ez da, zeren eta txarteldegian duen arrakasta ukaezina baita. Niretzako duen lanik borobilena den azken honekin, arrakastaz gain, onarpena ere lortu du, haibat saritan pisu handiko izendapenak erdietsi ditu eta.