Aste honetan, Wim Wendres Alemaniako zuinemagilearen azken lana nahi dizuet gomendatu; zein eta “Perfect Days” (2023) izenekoa, alegia. Pelikula ederra da oso; itxuraz txikia, baina izaeraz zirraragarria. Egunerokotasunak ematen dizkigun plazer txikien ospakizuna da filma. Zuzendariaren begirada zehatzari esker, gauza txikien garrantziaz ohartzeko parada dugu. Balore asko eta oso beharrezkoak azaltzen zaizkigu pantaila erraldoian, hala nola, ahaleginaren garrantzia, begirunea, besteen onarpena, egunerokotasunaren mirespena… Zuzendariak protagonistaren errutinak erakusten dizkigu zehaztasun handiz, baita bere ilobaren agerpenarekin bere bizitzan gertatzen den lurrikara ere.
Zintak bere denbora hartzen du istorioa kontatzeko, baina pazientzia izango duen ikusleak sari ederra jasoko du. Ez da ahaztu behar hauxe dela Japoniak Oscar Sarietan lehiatzeko aurkeztu duen pelikula eta Nazioarteko Film Onena eskuratzeko hautatuen artean dagoela.
Japonia ordezkatuko duen zinemagile alemaniar honek oso ibilbide emankorra du eta bere lanen artean “Paris, Texas” (1984) edo “Buen Vista Social Club” (1999) bezalako lan handiak aurki ditzakegu.
Hala eta guztiz ere, kasu honetan badago besteen gainetik nabarmendu behar dugun ekarpen bat, nire ustez behinik behin, eta horixe da Kôji Yakusho aktore japoniarraren jarduna, zeinak pelikularen zama guztia bere gain hartzen duen maisutasun handiz.