Aste honetan, Celia Rico Clavellino, Sevillako Constantina udalerrian jaio zen zinemagilearen azken lana nahi dizuet gomendatu, zein eta “Los pequeños Amores” izeneko pelikula.
Pertsonen arteko harremanek, are gehiago oso gertukoak direnen artekoek, aztertzea merezi duen mundua osatzen dute. Egitura sinple duen lana da hau. Ikustean, egiten erraza dirudien filma den arren, oso kontu konplexua da era honetako zinta bat burutzea eta zuzendariak primeran moldatzen da. Ikusten dugun guztia egiazkoa iruditzen zaigu. Izan ere, antzeko kontuak guztioi gertatu baitzaizkigu inoiz.
Hauxe dugu Celia Rico Clavellinoren bigarren film luzea, bi lan hauez gain film labur bat ere badu. Ematen du Sevillako zuzendariak mota honetako lanetan trebezia berezia duela. Bere aurreko pelikulak, “Viaje al Cuarto de una Madre” (2018) delakoak, oso bestelako gauzak kontatuz noski, film-unibertso bera partekatzen du. Nire uste apalean, biak ala biak zinta interesgarriak dira oso.
Esan gabe doa era honetako lan bat planteatzen duzunean, ezinbestekoa dela aktoreekin asmatzea. Duda barik, Celiak kasu honetan bete-betean asmatu du. Bai María Vázquezek, bai Adriana Ozoresek karakterizazio borobilak burutzen dituzte, haien pertsonaiek behar dutena ezin hobeto gorpuztuz.