Aste honetan, Australian jaio zen George Miller zinemagilearen azken pelikula nahi dizuet gomendatu, zein eta “Furiosa: A Mad Max saga” (2024) izenekoa. Bisualki oso lan indartsua da. George Miller nortasun handiko zuzendaria izanik, bere edozein lan ikustean, berehala dakizu nor dagoen kameraren atzean. Gainera, Mad Max oso saga pertsonala da, zeinean bere unibertsoa inon baino hobeto ordezkatuta dagoen. Hala eta guztiz ere, nahiko harrigarria da bere filmografia arakatzea. Hola, ezuste handiak har ditzakegu dituen pelikulak ikustean.
Zinta honetan, Furiosa izeneko pertsonaiaren hastapenak ezagutuko ditugu. “Mad Max: Fury Road” (2015), aurreko filmean aurkeztu zen karakterra dugu hau. Pelikula hartan indar handikoa zela ikusi bazen ere, oraingo honetan barneratuta duen haserre horren jatorria zein den jakingo dugu.
Esan bezala, George Miller da zinta honen zuzendaria. Aipa ditugun film biak kontuan izanda, nahiko harrigarria irudituko zaizue bere filmografian “El Aceite de la Vida” (1992) edo “Happy Feet: Rompiendo el Hielo” (2006) tankerako izenburuak topatzea.
Amaitzeko, aktoreen lana goraipatu nahi nuke, bereziki Anya Taylor-Joy eta Chris Hemsworthen karakterizazioak. Biek gozatu ederra hartu zuten film hau egiten eta nabaritzen da, bai jauna!