Aste honetan, Fede Álvarez Uruguaiko zinemagilearen azken lana nahi dizuet gomendatu, zein eta “Alien: Romulus” (2024) delakoa. Nire uste apalean batere beharrezkoa ez den pelikula baten aurrean gauden arren, kalitate handiko produktu bati buruz ari gara. Izan ere, Ridley Scottek 1979an sortu zuen lan bikainak, “Alien” (1979) izenekoak alegia, ez du bestelako azalpenik behar. Ikusleak elementu nahiko ditu bere buruan gustuko istorioa osatzeko. Nik uste etorri diren gainerako lan guztiek, oso bestelako mailetakoak izan direnak gainera, ikuslearen irudimena murriztu baino ez dutela egin.
Kronologikoki ikusi genituen hasierako bi zinten artean kokatzen den film honek une hartako bizimodua ederto batean deskribatzen du eta sinesgarritasun handiko beldurrezko mentura bat jartzen digu begien aurrean. Bisulaki lan potentea da, ondo kontatuta dagoena eta tentsioari eusten diona. Alderdi horretatik ez dago kexarik; hori bai, pertsonaia potente eta nahiko ondo garatuta pantailaratzen dizkiguten arren, nire ustez behintzat, hasierako pelikularen karakteren aurrean ez dute mailarik ematen.
Esan bezala, zinta honen zuzendaria Fede Álvarez da. Lan ona egiten duen arren, behin baino gehiagotan esan dudan moduan, ez dut uste beharrezkoa denik. Telebistarako lan batzuk edukitzeaz gain, pare bat film labur eta hiru pelikula ere burutu ditu egun arte. Seguruenik, gomendatzen ari naizen pelikula hau izan da orain arte egin duen lanik borobilena