Aste honetan, Todd Phillips Brooklyngo zinemagileraen azken pelikula nahi dizuet gomendatu: zein eta “Joker: Folie à Deux” (2024) izenekoa alegia. Lanaren inguruan mota guztietako iritziak dauden arren, arrakasta handiko zinta baten sekuela dela jakinik, nire ustez behintzat, ezin da esan palikula hau askoz txarragoa denik aurrekoarekin alderatuta. Izan ere, tarteka, une handiak eta ederto filmatuak eskaintzen ditu, zuzendariaren ukitua somatu egiten da. Aurreko pelikularen ezaugarriak hortxe daude: pertsonaien konplexutasuna, filma bustitzen duen tristezia, igortzen duen arrisku.sentsazioa… Hala eta guztiz ere, badago zerbait, ukitu ezin daitekeena, esaten dizuna hauxe ez dela aurrekoa bezain borobila. Istoria, akaso, ez da horren interesgarria, sorpresa efektua galduta dago… zine-aretotik irteten zarenean, sentsazio gazi-goxo bat duzu, nire kasuan bederen hala izan zen.
Egia esateko, a priori oso proposamen erakargarria iruditzen zait. Niretzako interes handikoak dira epaiketak kontatzen dituzten lanak eta musikalak gustuko ditut. Hau guztia, dena dela, zehaztu behar da. Izan ere, ez baitut uste film musikal baten aurrean gaudenik; tarteka, hori bai, musika-amanaldiak daude, oso borobilak gainera, baina ezin dugu esan istoria kontatzeko ezinbesteko osagaiak direnik. Eta epaiketa oso ondo jasota dagoen arren, erdibidean geratzen da.
Amaitzeko, aktoreen jarduna oso egokia dela nabarmendu nahiko nuke, baina pertsonaia batzuen pisua desorekatuta dago, nire iritziz behinik behin.