Aste honetan, ohikoa ez dudan zerbait egingo dut: zer eta gustuko izan ez dudan pelikula bat gomendatzea. Izan ere, “The Substance” (2024) zinta arrakastatsua gomenduatu nahi baitut. Estilo honetako zinta batzuk oso gustuko izan ditut, hala nola, “The Fly” (1986) David Cronenberg zuzendariaren film handia edota “Invasion of the Body Snatchers” (1978) Philip Kaufman zuzendari amerikarraren zinta interesgarria. Gomendatzen ari naizen lan honekin gauza bitxi bat gertatzen zait. Alde batetik, Coralie Fargeat Parisko zinemagilearen azken lan honen abiapuntua oso interesgarria iruditzen zait; baina, beste alde batetik, puntu batera helduta, pantailan ikusten dudanak ez dit inolako erakargarritasunik sortzen. Hala eta guztiz ere, muturreko proposamena dela argi dago, tankera guztietako komentarioak entzun ditut eta. Dena dela, nire ustez norberak ikusi eta ondorio propioak atera behar ditu beti eta, noski, zentzu honetan, pelikula gomendatu besterik ezin dut egin.
Ez da Coralie Fargeat ezagutzen dudan zinemagile bat eta pelikula honi heldu aurretik bere beste lan bat ikusi egin nuen, zein eta “Reality+” (2014) film laburra. Bada, kasu honetan, erabat erakarri nuen proposamena izan zela esan behar dut. Originala iruditu zitzaidan eta denbora osoan mantendu ninduen pantailari interes hadiz begiratzen, gutxi ez dena.
Amaitzeko, nabarmendu nahi nuen pertsonaia partekatzen duten bi emakumezko aktoreen jarduna. Asko ari da goraipatzen Demi Moore aktorearen lan bikaina, eta ez da gutxiagorako, baina nire itritziz gehiegi ari da estaltzen Margaret Qualley-ren karakterizazio ona.