Aste honetan, Ryan Coogler, Oackland hirian munduratu zen Ameriketako Estatu Batuetako zinemagile gaztearen azken pelikula nahi dizuet gomendatu: zein eta “Sinners” (2025) izenekoa, alegia.
Pelikula honek genero nahasketa potentea du. Haien artean beldurrezko pelikula bat ere barneraturik dago. Aitortu behar dut ez dela hau nire generorik maitatuena, hala ere, lan interesgarri baten aurrean gaudela esan behar dut. Gai zentrala bakarra den arren, nire ustez azpigai gehiegi jorratzen ditu, nire kasuan nolabaiteko dispertsioa eragin duena.
Zinta hau Michael B. Jordan aktore estatubatuarrarentzat erronka handia izan da. Izan ere, anai bikiak gorpuztu behar izan baititu Santa Ana hirian jaio zen antzezleak. Arlo honetan onik atera dela esan beharra daukat.
Zuzendari gazte honek baditu hainbat lan entzutetsu bere ibilbidean zertuak. Nire iritziz onena, gomendatzen ari garen hau kendua, “Creed. La Leyenda de Rocky” (2015) izenekoa delarik.
Aipatu izan dut dagoeneko ez dela izan txunditu egin nauen film bat, baina hori iritzi pertsonal hutsa baino ez da. Bestalde, ari naiz gomendatzen zeren eta, guztiz borobila ez den arren, nire ustez gauza interesgarriak baititu eta, ez dezagun ahaz, norberak ikusi ondoren atera behar dira ondorioak. Eta horretarako zine aretora joan behar da, azken bolada honetan galtzen ari den ohitura ederra.