Ikus-entzunekoen paradigma asko aldatu da azken urteetan. Interneten etorrerak, banaketa moduak azkartzea eta erraztea ekarri du. Oso ohikoa ari da bihurtzen berehalako kontsumoa eta alokairua, baita bideojokoetan ere.
Euskarri fisikotik digitalera salto egin dute hainbat zine banatzailek. Lehengo DVD alokairuetatik gaur egungo HBO, Netflix eta antzerako sareko bideo klubetara.
Bada, bideo-jokoak ere ez dira atzean geratu, eta aspalditik ditugu eskura Steam bezala jokoak sarean saltzen dituzten plataformak. Jokoa sarean erosi eta gure jokoen liburutegi birtuala edukitzeko aukera ematen du. Euskarri fisikoen beharrik izan gabe. Baina, azken boladan pauso bat harago ere eman dute hainbat konpainiek. Hilabeteko kuota baten truke, beraien katalogoko edozein jokotan jokatzeko aukera ematen dizuten plataformak agertzen hasi dira: Xbox Game Pass, Play Station Now, Origin Access... Bakoitzak bere etxe aldera ekartzen zaitu, ordea. Play Station Nown, adibidez, ez duzu Xboxeko jokorik aurkituko. Esklusibitatea zaintzen dute, eta liburutegi birtual hori estuki konpainia horrek saltzen duen kontsolarentzat diseinatu eta prestatua dago. Zoritxarrez kontsola ezberdinetan jokatzea gustuko dugun jokalariontzat urrun dago bideo-jokoen liburutegi birtual unibertsala. Baina lasai, hori ere etorriko da. Denbora kontua besterik ez dela oso ziur nago.